Од состанокот на Комитетот за отпад

Влада на РМ -

Скопје, 9 февруари, 2010година

Тринаесеттата седница на Комитетот за отпад при Владата на Република Македонија, имаше за цел ревидирање на состојбите со имплементација на Законот за отпад и вклученост на сите релевантни чинители во извршувањето на истиот, како и информација за извршени инспекциски надзори согласно Законот за управување на отпад од страна на Државниот инспекторат за животна средина.

По првата точка извештај поднесоа претставници на министерството за внатрешни работи, како и директорот на Државниот инспекторат за комунални прашања, кој во своја надлежност ја има и контролата на работата на локалните комунални инспектори. Повторно е нагласено дека е тотално незадоволителен бројот на комуналните инспектори на локално ниво. Заради поефикасно спроведување на овој закон се предложи да се организира работилница, веројатно во месец март, на која ќе се поканат сите градоначалници, како и претставници на министерството за транспорт и врски и министерството за внатрешни работи, како главни извршители на одредбите на овој закон.

Една од информациите од овој состанок е дека претставници на Министерството за финансии позитивно се изјасниле за идејата да им се дозволи на општините да се задолжат, доколку тоа ќе им помогне во набавката на возила зса комунален смет.

Директорот на Државниот инспекторат за животна средина истакна дека во последните три месеци направиле преку 600 инспекции и дека се откриени големи неправилности како во работата на приватните компании, така и во работата на општинските комунални претпријатија.

Претставниците на ЗЕЛС го истакнаа незадоволството од начинот на кој се издаваат лиценци за собирање на комунален отпад на приватни фирми, кои при тоа немаат склучено договори со депониите. На овој начин, освен што се загрозува работата на општинските комунални претпријатија се врши и загадување на природата, бидејќи приватните компании можат да го складираат отпадот и на диви депонии или на други нелегални места.